எங்கள் வீட்டில் எந்நாளும் ஆயில்யம்.

அகத்தியரை வழிபடும் முறைகள்

ஓம் அகத்தீசாய நமஹ.

குருநாதரை எனக்கு தெரிந்த எல்லா மார்க்கத்திலும் இடைவிடாது வழிபடுவது பேரானந்தமானது.  நானும் blog எழுதுகிறேன் பேர்வழி என்று எனக்கு தோன்றியதை வைத்தோ அல்லது எங்காவது படித்ததை மட்டும் வைத்தோ எழுதாமல், என் அனுபவத்தை வைத்து எழுதியிருக்கிறேன்.   இரண்டு வாரங்களுக்கு முன்பே இந்த பதிவை எழுதி முடித்துவிட்டேன். ஆனால், உடனே வெளியீடு செய்ய மனம் தயங்கியது. நான் ஒருவேளை டம்பம் என்னும் தம்பட்டதினால் இப்படி எழுதுகிறேனோ என்ற கவலை என்னை தாமதப்படுத்தியது. என் குருவை தொடர்ந்து வழிபட்டு என் மனக்குழப்பத்தை நீக்கி, நல்லோர்க்கு இந்த பதிவு போய்சேரட்டும், எல்லாம் குருவருள் என்று வெளியிட முடிவுசெய்தேன். இந்த தாமதமும் நன்மைக்கே, வரும் ஆயில்யத்தை ஒட்டி வெளிவருவதும் சிறப்பே.

எனது அனுபவத்தில் நான் குரு அகத்தியரை எப்படியெல்லாம் வழிபட்டு பேரானந்தம் அடைகிறேன் என்பதை இங்கு எழுதியுளேன். இந்த பதிவை படிப்போருக்கு அகத்தியரின் பரிபூரண அருள்கிட்ட வேண்டுகிறேன்.

யான் பெற்ற இன்பம், பெறுக இவ்வையகம்.

பக்தி மார்க்கம் :-

  குரு அகத்தியரை உருவமாக பாவித்து மலர்கள் மூலிகைகள் படைத்து அர்ச்சனை செய்து வழிபடுவது எனக்கு மிகவும் பிடித்தமானது. எங்கள் பகுதியில் உள்ள தேனீஸ்வரர் கோவிலில் அகத்தியர் சிலை உள்ளது. வாரம் ஒருமுறையேனும் குடும்பத்துடன் சென்று அகத்தியரை வழிபடுவது எங்களுக்கு மிகுந்த மனநிம்மதியை தரும்.  இது அகத்தியரை விரும்பும் யாவருக்கும் எளிதில் சாத்தியமானது. பாசமுள்ள அகத்தியமாஹாமுனி இந்த மார்க்ககத்தில் யாவரும் வழிபடுவதை அவர் மிகவும் விரும்புவதை நான் சூச்சமமாக உணர்ந்தேன். நான் கடந்த வருடம் யோக மார்க்கத்தில் முழு ஈடுபாட்டோடு இருக்கும்போது பக்தி மார்க்கத்தை அடிக்கடி ஏளனம் செய்து, குருவிடம் நான் கடும் தண்டனை வாங்கியதுண்டு. இந்த கலியுகத்தில் பக்தி மார்க்கம் மிகவும் எளிதானது ஆற்றல் வாய்த்தது. எங்கள் வீட்டில் மூன்று அடிகள் உயரத்திற்கும் மேலான அகத்தியர் படம் வைத்து எங்கள் குடும்ப தலைவனாக தெய்வமாக வழிபடுகிறோம்.  குடும்பத்தார் அனைவருக்குமான ஆசைகள், மனவேதனை, முக்கிய முடிவுகள் மற்றும் அதன் பலன்கள் அனைத்தையும் அவர் திருவடிகளில் தினமும் சமர்ப்பிப்பது எங்கள் குடும்பத்தார் வழக்கம். அதே சமயத்தில் அகத்தியர் பேரைச் சொல்லிக் கொண்டு யாரேனும் எங்களை ஏமாற்ற நினைத்தாலே, அவர்களை கண்டுகொள்ளவும் எங்களுக்கு தெரியும். அவ்வாறு செய்து, பிறகு அகத்தியரின் தண்டனைக்கு ஆளாகி பலர் வருந்துவதை நாங்கள் கண்கூடாக பார்த்திருக்கிறோம்.

கர்மயோக மார்க்கம் :-

      அறவழியில் பொருளீட்டி, அன்பான இல்லறம் நடத்திக்கொண்டே இறைவனை வழிபடுதலே அனைத்து மார்க்கத்திலும் மிகவும் சிறந்தது. அகத்தியர் அருளால் எனக்கு ஒரு மாறுபட்ட பக்குவம் கிடைத்தது. உங்களுக்கும் கிடைக்கும்.

எனக்கு இரண்டு குழந்தைகள் உண்டு. ஒரு வியாழனன்று, அகத்தியரை வழிபட மலர்கள் இல்லாமல் சிறிது மனவருத்தமாக நின்றுகொண்டிருந்தேன். அப்போது ஒரு விசித்திர யோசனை. என் இரு மகள்களையும் அழைத்து, அகத்தியர் முன்பு நிர்க்கட்செய்து, "மலர்ப்பாதம் உடைய மகாமுனி தெய்வமே! இன்று இந்த இரு மகள்களையும் உங்களுக்கே மகள்களாக முழுமனதுடன் நான் சமர்ப்பிக்கிறேன்.

 இன்றுமுதல் அடியவன் நான் உங்கள் வேலைக்காரனாக உங்கள் மகள்களை வளர்த்து கடமை செய்வேன் என் எஜமானானே! இவர்கள் சாதனை பதக்கங்கள் வாங்கினாலும் சரி, சோதனை நலனுபவங்கள் வாங்கினாலும் சரி! இரண்டுக்கும், நீங்களே இவர்கள் தந்தையாக பொறுப்பு. நான் என் கடமையை மட்டும் சிரத்தையோடும் விசுவாசத்தோடும் செய்வேன்" என்று வாக்குக் கொடுத்துவிட்டேன்.

     இறைவனை தேடுகிறேன் அல்லது வணங்குகிறேன் என்ற பெயரில், நம்மீது அன்புகொண்ட குடும்பத்தாரையும், நம் கடமைகளையும் புறக்கணிப்பதை அகத்தியர் விரும்புவதில்லை.

தான மார்க்கம் / தர்ம மார்க்கம் :-

     "தர்மம் செய்ய செய்ய, உன் கர்மம் குறையுமப்பா" என அகத்தியர் உரக்க வாக்கு சொல்லியிருக்கிறார். கர்ணனின் தர்மத்திற்கு முன் பகவான் கிருஷ்ணனே ஒரு பிச்சைக்காரனாக கெஞ்சி நின்றிருக்கிறார். இறைவனையே கட்டுப்படுத்தும் இரண்டு ஆயுதங்கள் - ஒன்று தர்மம் மற்றொன்று அன்பு.

    என் மாத வருமானத்தில் குறைந்தது இரண்டு முதல் ஐந்து சதவிகிதத்தை, எந்த எதிர்பார்ப்பும் இல்லாமல், மத வேறுபாடு இல்லாமல் ஆதரவற்றோர்க்கு நேரடியாக என் குடும்பத்துடன் சென்று தானம் செய்துவிட்டு, அதற்காக கிடைக்கும் புண்ணிய மலர்களை எங்கள் அகத்தியர் பாதத்தில் சமர்பித்து வணங்குவோம். இந்த அகத்தியர் வழிபாட்டை பல ஆண்டுகளாக நானும் என் மனைவியும் இறைவன் அருளால் தொடர்ந்து செய்கிறோம். பொதுவாக தான தர்மம் செய்வதை வெளியே சொல்லக்கூடாது என்பார்கள். ஆனால், இதை ஊக்கமாகவோ அல்லது போட்டியாகவோ பிறரும் செய்தால், அவர்களும் இறைவனால் அருளப்பட்டு, அவர்களும் அவர் சந்ததியும் உயர்நிலைக்கு வருவார்கள் என்பதில் சிறிதும் ஐயமில்லை.

யோகஞான மார்க்கம் :-

      மேலே குறிப்பிட்ட மார்க்கங்களில் இறைவனை மனதார வழிபட்டோரை, சித்தர்கள் தாமாக தேடிவந்து மனமுவந்து பக்தனின் உடல் மற்றும் மனம் பக்குவமறிந்து காட்டும் அடுத்த நிலை யோகஞான மார்க்கம்.  இதற்க்கு சிறிது பரந்த மனப்பான்மை வேண்டும்.   சிவானந்த யோக வேதாந்த நிலையத்தின் சுவாமி விஷ்ணுதேவனந்தா கூறியபடி “ஞான யோகத்தை பயிற்சிக்கும் முன்னர், மற்ற யோக மார்க்கங்களின் பாடங்களை ஒருவன் ஒருங்கிணைத்திருக்க வேண்டும். தன்னலமின்மையும் கடவுளிடம் அன்பும் இல்லாமல், உடல் மற்றும் மனவலிமை இல்லாமல், தன்னை அறியும் தேடல் வெறும் சோம்பேறிக் கற்பனையாக மாறிவிடும் சாத்தியமுண்டு.”

      இன்றைக்கு எங்கு பார்த்தாலும் பத்து ரூபாய் முதல் பத்து லக்ஷம் ரூபாய் வரை விற்கப்படும் பரிதாபத்திற்குரிய சாதனம் தான் இந்த யோக ஞான மார்க்கம்.       தவ பயிற்சிகளின் மூலம் இறைவனை வழிபடுவது. இது சித்தர்கள் ( தன்னை xyz சித்தர் என பட்டமிட்ட மனிதர்கள் அல்ல ) கருணையினால் ஒரு நையா பைசா செலவில்லாமல் தாமாகவே தக்க சமயத்தில் கிடைக்கும். இதற்காக நீங்களாகவே விரும்பிச் சென்றால் ஏமாற்றப்படுவீர்கள்.   தாமாக எப்படி கிடைக்கும் என்கிறீர்களா ? நிச்சயம் கிடைக்கும். அதை என் முந்தய பதிவுகளில் எழுதியிருக்கிறேன். என்னை ஈன்ற அகத்தியரை என்னுள் வைத்து வழிபடும் ஆனந்தம். இப்படி சொன்னவுடன் 'இவன் ஏதோ சாமியார் போல' என்று நீங்கள் நினைத்தால் நீங்கள் ஏமாந்து போவீர்கள் :-)  :-).  அறவழியில் பொருளீட்டி அன்பான இல்லறம் நடத்திக் கொண்டு இந்த வழிபாட்டை செய்ய வேண்டும் என்பதுதான் சித்தர்களின் விருப்பம். இல்லற வாழ்க்கை இன்னும் சிறக்கும். இந்த யோகஞான மார்க்கம் என்பது எட்டாக்கனியோ அல்லது விசித்திரமோ அல்ல. பக்தி மார்கத்திலேயே நமக்கு அனைத்து செல்வங்களும் இறைவன் அருளால் நிச்சயம் கிடைக்கும், முக்தியும் கிடைக்கும். ஒருநாளும் தவறாமல் உங்கள் இஷ்டதெய்வத்தை வணங்கி வாருங்கள்.

         மேலே சொன்ன அனைத்து மார்க்கங்களிலும் உங்கள் இஷ்ட தெய்வத்தை வணங்கும்போது, நீங்கள் தானாகவே இயம நியமத்தின் சிறப்பை பெறுவீர்கள். பின்பு தானாகவே யோகப்பாதையை சித்தர்கள் உங்கள் பக்குவமறிந்து, சரியான காலகட்டத்தில் அருள்வார்கள். இன்றைக்கு வாசியோகம் / யோகா பாதையில் இருப்போர், மற்றும் யோகம் பழக விரும்புவோர் உடனடியாகவும் நேரடியாகவும், வெறும் யோக நுணுக்கங்களை மட்டும் கேட்டோ படித்தோ வெற்றி பெற விரும்புகிறார்கள். இது எனக்கு சிறிது நகைச்சுவையாக உள்ளது. பசியோடு இருக்கும் ஒருவன் முதலில் ஒரு இட்லி சாப்பிடுகிறான். பின்பு இரண்டாம் இட்லி, மூன்றாம் இட்லி, நான்காம் இட்லி... ஐந்தாம் இட்லி சாப்பிட்டபின் அவன் பசி அடங்கிவிட்டது. இதைப் பார்த்த ஒரு புத்திசாலி தன் மனதில் "அப்படியானால், அந்த கடைசி ஐந்தாம் இட்லியில் தான் பசியடங்கும் சூட்சமம் உள்ளது, எனவே முதல் நான்கு இட்லியை உதாசீனம் செய்துவிட்டு, நேரடியாக “ஐந்தாம் இட்லியை மட்டும் சாப்பிட்டால் போதும்", என்ற முடிவுக்கு வந்தானாம்.

   

யோகமார்க்கத்தில் இருப்போர்க்கு கீழ்கண்ட என் வழிபாட்டுமுறை புரியும். குருவருளால் எனக்கு கிடைத்த "அகத்தியர் பரிபூரண ஞானம் 35 " என்னும் நூல் எனக்கு நல்ல தெளிவையும் மகிழ்வையும் தந்தது. சில பாடல்களை என் சிற்றறிவிற்கு எட்டிய விளக்கத்துடன் பார்ப்போம் வாருங்கள்.

பாடல் 7 :

"சேர்த்தாக்கள் மனமறிவில் சேர்க்கவேணும்,

    தீபவொளி ஒளிகான தெளிவுவேணும்

நூத்தக்கால் அம்பரநூல் நூற்கவேணும்

    நோய்யென்ற உயிரெல்லாம் நொறுக்கவேணும்

 மூத்தக்கால் இந்நூலில் ஊக்கவேணும்

    முனைமீதில் அகத்தியமா மூர்த்தியமே.”

முக்கிய பொருள் : அகத்தியரை வணங்கி யோகமார்க்கத்தில் வாழ்வோருக்கு, அகத்தியரே சுழுமுனை மேல் நின்று அருள் புரிவார். 
audio1  https://drive.google.com/file/d/1jNCXiWInKWXat0Z57VaHidVAQJb_8dK3/view

அப்பனா? ஆஸ்தியா? எது வேண்டும்?

ஒரு மகனுக்கு அவன் அப்பனைவிட, அப்பனின் ஆஸ்தி பெரிதாகுமோ ?

கருணைமிகு அகத்தீசர் அப்பா அன்புக்கு கட்டுப்பட்டவர். பக்தனுக்கு உண்மையான பக்தி இருந்தால், அப்பா அழைத்தவரிடம் உடனே வர தயாராக உள்ளார். அருள்பொழிய கருணையோடு காத்திருக்கிறார்.  யோகநுணுக்கம் இருந்தால், அப்பாவின் ஆஸ்தியான ஞானயோக சித்தி கிடைக்கும். ஆனால் அது சுலபமல்ல. கடினமான சுயமுயற்சி, பல சோதனைகளை தாண்ட வேண்டும். யோகஞான சட்டப்படி, பல பல படிநிலைகளை தாண்டியே சித்தியாகும்.  பலரும் வாசியோகம் மட்டுமே சித்தியாக வழி என உழைக்கிறார்கள். முறையான வாசியோகம், முதலில் மூலாதாரத்தில் சித்தியடைந்து பிறகு ஒவ்வொரு சக்கரமாக சித்தியாகவேண்டும். இது கலியுகத்தில் மிகவும் சிரமமானது. பதினெட்டு சித்தர்களில் ஒரு சித்தர் தாமாக அருளாமல், வெறும் வாசிநுணுக்கத்தை மட்டும் செய்து, சித்தி அடைய இன்றைய காலகட்டத்தில் முயற்சிப்பது முழுப்பலனை அளிக்காது.

அகத்தீசர் கருணை இல்லாமல் ஞான சித்தியில் எந்த முன்னேற்றமும் இருக்காது. எல்லா உழைப்பும் வீண்தான். இன்றைய காலகட்டத்தில், அகத்தீசர் முதலில் பக்தியோகத்தில் நன்கு தேற அறிவுறுத்துகிறார். இதுவே இயம நியமத்திற்கான சரியான வழி. மேலும், நம்மை சுற்றியுளோர்க்கு பக்திமார்கத்தின் சிறப்பு, கோவில் வழிபாட்டின் சிறப்புகளை எடுத்து சொல்லி, இயன்றவரை அனைவரையும் இறைவழிபாட்டில் முன்னேறி வர ஊக்கப்படுத்த சொல்கிறார்.  பக்திமார்க்கத்திலும், வேதமார்கத்திலும் தானும் முன்னேறி, தன்னை சுற்றியுள்ளோரையும் ஊக்கப்படுத்தும் பக்தனை, அகத்தீசர் கருணையோடு கண்டுகொண்டு தாமாகவே அவருக்கு அடுத்தகட்டமான யோகஞான பாதையை காட்டுவார். 

அகத்தீசர் கருணையோடு பக்தனிடம் வரும்வரை, தொடர்ந்து முழு மனதோடு பக்திமார்க்க வழிபாட்டில் இருக்கவேண்டும். இதையே அகத்தீசர் விரும்புகிறார். அப்படிப்பட்ட பக்தனையே அவர் அடுத்தகட்டத்திற்கு முறையாக அழைத்துச்செல்வார்.

      அன்பிற்குரிய அப்பனைவிட, அவன் எழுதிய ஆஸ்தி (யோகஞானம்) பெரிதல்ல. *அப்பன் அகத்தியனே அனைத்து ஞானத்திலும் உயர்ந்தவன்*. கருணை நிறைத்த சிவதெய்வம். ஈஸ்வரனாய், நாராயணனாய், சக்தியாய், ஜோதியாய், வெட்டவெளியாய் அருள்பாலிக்கும் அகத்தீசர் பொற்பாதம் போற்றி போற்றி !!.

அலைந்து செத்தாலும் அகத்தீசரை வணங்கி சா. சித்தி முத்தி சிக்காமல் சீர்மிகு அகத்தீசர் பாதம் மட்டும் வணங்கு. கருமம் எனும் வினைப்பதிவில் கடுமையாய் சிக்கிவிட்டாய். பேராசை கொள்ளாதே, பேயாக திரியாதே !.  அஷ்டமாசித்தி என்பார், சாகாத உடலென்பார், மாயயோக ஆசையில் அகப்பட்டு மயங்கி நீ இருக்காதே! அருளான அகத்தீசர் பாதம் மட்டும் வணங்கு. மகத்தான ஜோதி அவரே! வெட்டவெளி நாதன் அவரே! நித்தம் நித்தம் வணங்கு, அப்படியே வரம் கேட்டுவிடு. பலகோடி ஜென்மமெடுத்தாலும் பார்புகழும் அகத்தீசர் பாதம் வணங்க வரம்கேளு.

அன்பான அகத்தீசரே! அருளான ஜோதியே! கும்பமுனி தகப்பனே! குருமுனீச ராஜா! சுழுமுனை ஜோதியே! வெட்டவெளி நாதரே! மகத்தான மாமுனியே... நின் மலர்ப்பாதம் தனையெடுத்து, என் மண்டைஓட்டின் மத்தி பதித்து, பொல்லாத அகம்பாவம் கொன்று என்னை விடுவிப்பாய் விமலநாதா !

ஓம் அகத்தீசாய நமஹ.

அகத்திய பக்தன்.

தறுதலை பிள்ளைகளுக்கு யார் காரணம்?

ஆலயம் தொழுவது சாலவும் நன்றா ? ஏன் ?

சமீபத்தில், எனது உறவுக்கார சகோதரியும் சகோதரனும், தங்கள் மகனும் மகளும் ஒழுங்காக படிப்பதில்லை, மேலும் சொல்பேட்ச்சும் கேட்பதில்லை என கவலைப்பட்டார்கள். இன்றைய இளைய தலைமுறையினர் எளிதில் மனமுடைந்துபோவது அல்லது உணர்ச்சிவசத்தில் முடிவெடுப்பது வெகு சுலபமாக உள்ளது.

பெற்றோர்கள், தாங்கள் "பெற்றோர்" என்ற அதிகாரம் அல்லது அன்பு, இவைஇரண்டை மட்டும் வைத்துக்கொண்டு தாங்கள் பிள்ளைகளை நல்வழிப்படுத்திவிடலாம் என நம்புகிறார்கள். நான் நிறைய குடும்பங்களை ஆராய்ந்ததில், இவையிரண்டும் எப்போதும் வேலைசெய்யும் என்ற உத்திரவாதம் இல்லை.  எந்தெந்த குடும்பத்தில் ஆன்மிகத்திற்கு முக்கியத்துவம் கொடுத்து, வாரம் ஒருமுறையேனும் கோவில்களுக்கு தாங்கள் குழந்தைகளை கூட்டிச்செல்கிறார்களோ, அந்த பிள்ளைகள் வளர்ந்தபின் தங்கள் இன்ப துன்பங்களை வாழ்வில் எதிர்கொள்ளும்விதம் ஆரோக்கியமானதாக உள்ளது.

கடவுள் நம்பிக்கை இல்லாத பெற்றோர்கள், வீட்டில் விளக்கு ஏற்ற சோம்பேறித்தனம், வாரம் ஒருமுறையேனும் கோவில் செல்லாத பெற்றோர்கள், கடவுள் இருக்கிறாரா? இல்லையா ? என தர்க்கம் செய்யும் பெற்றோர்களின் பிள்ளைகள் பெரும்பாலும், "தறுதலைகளாகவே" வளர்க்கிறார்கள். இந்த வார்த்தையை உபயோகிப்பது எனக்கு மனவருத்தமாக உள்ளது. ஆனால், நான் ஏதோ வாய்க்கு வந்ததை அடித்துவிடவில்லை. நிறைய பாதித்த குடும்பங்களை பார்த்தபின்னரே இப்பதிவை எழுதுகிறேன்.

   பிள்ளைகளை உருப்படியாக வளர்க்காமல், எப்போதும் பணம்சம்பாதிக்கிறேன், பிசியாக இருக்கிறேன் என்று வாழ்ந்து என்னையா பலன் ? கோவில் என்ற மனோதத்துவ சூட்சுமத்தை புறக்கணித்துவிட்டு,

பிறகு சமுதாயத்தையும் சுற்றுபுறத்தையும் குறைகூறி என்ன பயன் ? இன்றைய மனிதன், தன் வாழ்வில் நிகழும் மகிழ்ச்சியான தருணத்திலும் மது அருந்தும் நண்பனை தேடுகிறான்,  சோகமான தருணத்திலும் மது அருந்தும் நண்பனை தேடுகிறான். அருகில் உள்ள கோவில்களுக்கும் சென்று தங்கள் மனஇறுக்கத்தை எளிதில் போக்கிவிடலாம் என்று நிறைய மனித ஜென்மங்களுக்கு தெரிவதில்லை. கடவுள் இருக்கிறாரா? இல்லையா ? என ஆராய்ந்துகொண்டே இருப்பதைவிட, அந்த பக்தியினால் வரும் பலன்களைப்பாருங்கள். உங்கள் வீட்டிற்கு அருகில் நிச்சயம் ஒரு கோவில் இருக்கும். அதிலும் பழமையான கோவில் உங்கள் பகுதியில் இருந்தால் நீங்கள் கொடுத்துவைத்தவர்தான். ஆயிரம் ஆண்டுகள் பழமையானவரை நீங்கள் சந்திக்க முடியாது, ஆனால் ஆயிரம் ஆண்டுகள் பழமையான கோவில் மரங்களின் உயிரூட்டம் நிச்சயம் உங்கள் மனதிற்கு ஆறுதல் தரும். அடுத்த சவால்களை சந்திக்கும் பக்குவத்தை தரும். சென்று பாருங்கள்.

    வெற்றி தோல்வி, இன்ப துன்பங்கள் எல்லா மனிதர்களுக்கும் பொதுவாக நிகழ்வது. யாரும் இதிலிருந்து தப்ப முடியாது. ஆனால், இதை எப்படி எதிர்கொண்டு வாழ்கிறார்கள் !! என்பதுதான் முக்கியம்.

   நான் இப்போதும் எனது தூரத்து மற்றும் நெருங்கிய உறவுக்காரர்கள் மற்றும் நண்பர்களின் குடும்பங்களை ஆராய்ச்சிக்காக கவனித்து வருகிறேன். கோவிலுக்கு செல்லும், மற்றும் செல்லாத குடும்பங்களின் தலைமுறையை இன்னும் பத்து ஆண்டுகள் கவனித்தபின் இந்தப்பதிவை மறுஆய்வு செய்யலாம். உனக்கு ஏன் இந்த வேலை? என நீங்கள் யோசிப்பது புரிகிறது. நமது முன்னோர்கள் தங்களின் கடின உழைப்பு, பணம் மற்றும் பெரும் பொருளை செலவழித்து இவ்வளவு கோவில்களை நமக்காக நம் சந்ததிக்காக கட்டியிருக்கிறார்கள். எனக்கும் உங்களுக்கும் அதில் நிச்சயம் ஒரு குறைந்தபட்ச   சமூக அக்கறை உண்டு.

எனது நட்பு மற்றும் உறவு உயிர்களுக்கு ஒரு வேண்டுகோள் :-

   தங்கள் கருத்து எதுவானாலும் இங்கே பதியுமாறு அன்புடன் வேண்டுகிறேன். பதிய இயலாதவர்கள் வாட்ஸாப்ப் அல்லது நேரில் கருத்து சொல்லுங்கள். தாங்கள் சார்பில் நானே பதிகிறேன்.  இதற்கான பதில் மற்றும் மறுஆய்வு பத்து ஆண்டுகளில்…

அக்கறையுடன் அகத்திய பக்தன்.

பிரம்மேந்திரன்.

Debugging some logics of life

Last week, the whole night stay in the temple without sleep, food and entertainment has given some inner analysis. Just tried to debug the logic of life and how it could be balanced. This is purely based on personal analysis by comparing some of my close relatives and friends life.  So, it is up to you how to take these points or ignore it.

Debugging approach differs person to person. It could be from Top to bottom, or bottom to top, or debug from some middle point etc., 

Below analysis is subject to your own research and how it can be applied in your life.

Universal power is ready to react when men is ready to balance. Every person’s life will definitely have at least one point which is available / satisfied enough, and at least one another point which is not available / not satisfied enough.  When that particular point which is not available / satisfied enough is worrying you a lot, then how it can be balanced in the right way ?  if every action has a reaction, then we can easily understand that the reaction is controlled by some particular action which is already available / achievable.  Hope I am not confusing you. let us see some cases for better understanding.

X Factor = at least one point which is available / satisfied enough in the current life.

Y Factor = at least one another point which is not available / satisfied enough.  This could be the worrying part in the current life.

Z Factor = The universal power or natural law or God or Medical / psychological reason which is going to balance the X & Y factors to increase the opportunity of Y Factor.

Example Case-1 :-

  Couples who do not have child for a longer time (Y Factor). In this case, the X Factor is, both the likeminded partners live together with love.  Also, additional X factors are the financial status of the couple. 

Here, the proposed logic to create the opportunity of Y Factor is to balance the X Factor for a particular period. How ?  That husband and wife  can plan a 48 days separation. ( Why 48 days?  27 stars + 12 Zodiacs + 9 Planets ). This blog is not too much towards religion or god. It is just debugging the logic from one point of view and trying to achieve the needed one. In the separated period, donate or do which you can to the needy children without any expectation.  This will support the Z Factor to act accordingly. Also, do regular prayers towards your beloved god for the Y Factor.  This gives good psychological support in this period. 

  I could understand some smart people, like this approach to enjoy their time in other useless or wrong way. For example, the wife worries for Y Factor, but husband is not interested much on this proposed logic. He tries to enjoy his time in a different way.  This wrong approach can be the bug situation which has to be excluded and can be called as “Fate”.

  Fine. What to do if the above logic fails ?  We need to find the other X factors which has to be balanced.  For example, if the partners has very good financial status and good properties for 2 or 3 generations, then they can donate those to the needy children’s education and food without any expectation. Holding properties for more than one generation is not a good balancing. I mean, no need to invest more properties and money for the grand children and further generations.

Example Case-2 :-

  Person with long duration diseases and he/she wants a healthy body ( Y Factor ).  In this case, the X Factor is, the person has enough food / money / properties.  The logic to improve Y factor is to observe “Fasting” for 48 days in a planned way as following.  First 12 days minimum normal food of vegetables and Fruits ( avoid meat, oil, spicy, salty food). Second 12 days only fruits. Third 2 days no food only water. Fourth 11 days only fruits. Fifth 11 days minimum normal food of vegetables and Fruits ( avoid meat, oil, spicy, salty food ).  You can consult with a nearby “Natural Food Medicine” doctor.  But, if you consult with your Allopathic or Ayurveda doctor, then he may not accept this plan. In this 48 days period, that person should donate food and medicine to the needy people without any expectation. This will support the Z Factor to act accordingly.

Like the above example cases, you can find the logic for other cases like peace of mind and professional life etc.,

Everyone should have some minimum buffer in his life to explore some research. Research always has some risk.  Do you always expect a 100% risk-free life? I do not think that could be a good life. This research period  should be at the right time when you have some normal or good energy in your body and mind.  One should not plan such research after his retirement when he almost lost his active body health and he is about to take rest and medical treatments in the last period of life.

Conclusion : Are you a balanced man ? or a superman in one particular area ? You know what to be balanced.

I am sorry if the above has bored you. I tried to explain as a typical software person :-) who has debugged millions of programs.

regards,

Prammendran

எங்கள் வீட்டுப்பெரியவர்

உத்யோகம் புருஷ லட்சணம். இன்றைய காலகட்டத்தில் அன்றாட உத்யோகத்திற்காக தன்னை தயார்படுத்துவது, குடும்ப தேவைகளை கவனிப்பது மற்றும் தனது உடல் / மனம் சீர்படுத்துவதற்கான அன்றாட பயிற்சிகளை தவறாமல் மேற்கொள்வது என்பது ஒவ்வொருவருக்கும் பெரும் சவாலான விஷயமாக உள்ளது. இதில் ஒன்றுக்காக மற்றொண்டை தியாகம் செய்வது இயலாத காரியம். அனைத்தையும் சமம் செய்து வாழ்க்கையை கடந்து செல்லவேண்டும். இதில் பெரும்பாலானோர் தனது கோபத்தை வெளிப்படுத்தி, தன்னையும் தன் குடும்பத்தையும் காயப்படுத்திவிடுவார்கள். இந்த சூழ்நிலைகளில் ஒரு பக்குவப்பட்ட பெரியவர் வீட்டிலிருந்தால் நிலைமையை கட்டுக்குள் கொண்டுவந்து குடும்பத்தினரை நல்வழியில் கொண்டுசெல்வார். என் வீட்டு அனுபவத்தை இங்கு பகிர்கிறேன்.

எங்கள் வீட்டில், அவரவர்க்கான தனிப்பட்ட வருத்தம் மற்றும் மகிழ்வை எங்கள் வீட்டு பெரியவர் அகத்திய மஹாமுனியிடம் அவ்வப்போது சமர்பித்துவிட்டு எங்கள் அன்றாட வேலைகளை தொடர்வது வழக்கம். நான் தினமும் யோகா, மூச்சுப்பயிற்சி மற்றும் தியானம் செய்ய குறைந்தது முப்பது நிமிடங்கள் ஆகும். சில நேரம் இது கூடுவதும் உண்டு.  அன்னவளுக்கு சமையல், வீட்டு வேலை, குழந்தைகள் பராமரிப்பு மற்றும் அவர்கள் படிப்பு என வேலை நாள் முழுக்க சரியாக இருக்கும். அன்னவளின் தினசரி இறைவழிபாடு மிகவும் எளியது. எங்கள் வீட்டில் பூக்கும் முல்லைப்பூவை பறித்து, ஒரு முழம்வரை பூக்கட்டி, அதில் பாதியை குருநாதருக்கும் மீதியை தனக்கும் வைத்துக் கொள்வாள். 

இதில் என்ன பெரிய விசேஷம் என்கிறீர்களா ? நான் மூச்சை அடக்கி நிறைய பாவ்லா காட்டி என்ன தான் குருநாதரை பூஜித்தாலும், அதை அவர் பெரிதாக கண்டுகொள்வது கிடையாது. ஆனால் அன்னவள் வைக்கும் சிறிய பிராத்தனைக்கும் அய்யா உடனே செவிசாய்த்து கண்டுகொள்வார். எல்லா அப்பாக்களுக்கும் தன் மகனைவிட தன் மகளின் மீதே அதிக பாசம் இருக்கும். மஹாசித்தரானாலும் குருநாதரும் இதற்கு விதிவிலக்கில்லை போலும். இது என்ன ஒரவஞ்சனையோ தெரியவில்லை.... இவன் இஷ்டத்திற்கு அள்ளி விடுகிறான், நாமும் வேறுவ்வேலையில்லாமல் இதை படிப்பதா ? என நீங்கள் யோசிப்பது எனக்குப் புரிகிறது. மேற்க்கொண்டு படித்துவிட்டு பிறகு யோசிக்கலாம். 

கடந்த சில மாதங்களாக, அடியவன் நான் யோக மார்க்கத்தைப் பற்றி அதிகம் படிப்பது, பயிற்சி என அதிக ஆர்வத்தில் குழந்தைகளைப் பற்றி சிறிதும் கவனம் இல்லாமல் எனது ஆராய்ச்சி மற்றும் பயிற்சி என இருந்துவிட்டேன். எல்லாவற்றையும் அன்னவள் பார்த்துக் கொள்வாள், என் வேலை சம்பாதிப்பதுடன் முடிந்தது என எடுத்தெறிந்து இருந்துவிட்டேன். அன்னவள் அனைத்து வேலைகளையும் இயன்றவரை செய்து துவண்டு விட்டாள். பொறுத்துப் பொறுத்துப் பார்த்துவிட்டு, அய்யாவிடம் வத்தி வைத்துவிட்டாள். இதை நானும் அப்போது அறியவில்லை. கடந்த இரண்டு வாரங்களாக எனக்குள் ஏதோ ஒரு மனக்குழப்பம், உடல் நிலையும் சரியில்லை. பகல் இரவு என எப்போதும் மூக்கடைத்து சுவாசிக்க மிகவும் சிரமப்பட்டேன். இது என்ன சோதனை அப்பா? என குருநாதரிடம் வேண்டி நின்றேன், அவர் நன்றாக முறைப்பதாவே தெரிகிறது ஆனால் அருள்பார்வை ஏதுமில்லை. எனக்கு ஒன்றும் புரியவில்லை. என்மேல் மிகவும் அக்கறையுள்ள யோகியிடம் கேட்டதில், அவர் சில ரத்த பரிசோதனைகளை செய்யுமாறு கூறினார். அருகில் உள்ள பரிசோதனை நிலையத்தில் விசாரித்ததில், இவைகள் மிகவும் ஆழமான பரிசோதனைகள், உங்களுக்கு இந்த பரிசோதனைகள் தேவையில்லையே என கூறிவிட்டார்கள். என் குழப்பம் அதிகமானது. நிதானமாக யோசித்ததில், அடியேனின் தவறு புரிந்தது. அன்னவளிடம் சமரசம் செய்துவிட்டு, அய்யாவிடம் மன்னித் தருளவேண்டும் என வேண்டினேன். அன்னவள் இந்த பரிசோதனைகளை செய்யும் முன்பு ஒருமுறை நம் பகுதியில் உள்ள குடும்ப வைத்தியரிடம் ஆலோசிக்குமாறு கூறினாள். அய்யாவை வணங்கி உடனே குடும்ப வைத்தியரிடம் சென்றேன். அவர் எனது நாடிகளை நிதானமாக பரிசோதித்துவிட்டு, "ஒரு வாத உடல், வலுக்கட்டாயமாக சிலேத்தும உடலாக மாற்றப்பட்டுள்ளது. பிறவி உடல் சமப்படுத்தப்பட வேண்டுமே தவிர முற்றிலுமாக மாற்றப்படக் கூடாது" என விளக்கிவிட்டு வைத்தியத்தை ஆரம்பித்தார். நீண்ட நாட்களாக இந்த செயல்முறை நடந்திருப்பதால், சகஜ நிலைக்கு வர சில நாட்கள் ஆகும் என கூறிவிட்டார். இப்போது முன்னேற்றம் உள்ளது. இந்த சிலேத்தும செயல்முறை காரணத்தை வேறு பதிவில் பார்க்கலாம்.

     கடந்த வருடம் நிகழ்ந்த மற்றொரு அனுபவம் எனக்கு அய்யா தந்த ஒரு அதிர்ச்சி வைத்தியம்.  பணி நிமித்தமாக சீனா ப்ரொஜெக்ட்டின் இறுதிக் கட்டமாக இரண்டு வார பயணத்தில் சென்றிருந்தேன். சீனாவில் whatsapp , skype என்ற முக்கிய இணைய தொடர்பு மென்பொருட்கள் தடை செய்யப்பட்டுள்ளது. வீட்டாரோடு பேசவேண்டு மெனில், அலுவலக லேப்டாப்பில் அலுவலக மென்பொருள் வழியாகத் தான் பேசமுடியும். லேப்டாப் சுவிட்ச் ஆன் செய்து மென்பொருளில் இணைப்பு பெற பத்து நிமிடங்கள் ஆகும். எனவே அன்னவளிடம் "என்னால் தினமும் பேசுவது சிறிது கடினம், வாரக் கடைசியில் பேசுகிறேன்" என்று சொல்லி விட்டேன். அன்னவளுக்கு இது மிகுந்த வருத்தத்தை கொடுக்கும் என நான் அப்போது அறியவில்லை. அத்தோடு வழமைபோல் அவள் அய்யாவிடம் சென்று ஒப்பிப்பாள் என நான் சிறிதும் எதிர்பார்க்கவில்லை.

மறுநாள் காலை வழமைபோல் சீனா அலுவலகத்திற்கு சென்றுவிட்டேன். காலை முதல் வேலையாக ப்ராஜெக்ட் மீட்டிங் நடக்கும். எனது பொறுப்பிலிருக்கும் வேலைகளின் தற்போதைய நிலையை நான் சொல்லவேண்டும். மீட்டிங் சில நிமிடங்களில் ஆரம்பித்துவிடும். என் லேப்டாப் சுவிட்ச் ஆன் செய்தால், ஒரு சமிக்கையும் இல்லை. லேப்டாப் பேட்டரி நல்ல சார்ஜில் இருந்தும் ஒரு பயனும் இல்லை. இடைவெளி விட்டு பலமுறை சுவிட்ச் ஆன் செய்தும் பலனில்லை. பல லட்சங்கள் செலவு செய்து என் நிறுவனம் பணி செய்ய என்னை சீனா அனுப்பியுள்ளது, ஆனால் பிரயோஜனம் இல்லாமல் நான் அனைவர் மத்தியிலும் பரிதாபமாக அமர வேண்டியிருந்தது. 

சீனா வல்லுநர்கள் ஆங்கிலம் பேச மாட்டார்கள், மேலும் என் லேப்டாப்ஐ format செய்தால் அனைத்து தகவலும் இழப்பத்துடன், தேவையான அனைத்து மென் பொருட்களையும் மீண்டும் நிறுவி பணியைத் தொடர சில நாட்கள் ஆகும். ஏதாவது ஈரப்பதம் சென்றிருக்கும் என நண்பர்கள் அறிவுரைப்படி முடி உலர்ப்பான் (Hair Drier ) உபயோகித்தும் பலனில்லை. அன்று மாலை வரை எப்படியோ சமாளிதாகிவிட்டது. ப்ராஜெக்ட் லீடரிடம் நிலைமையை சொல்லிவிட்டு, வேறு லேப்டாப் உடனே கொடுங்கள் அல்லது ஊர் திரும்ப வேண்டியதுதான் என முடிவெடுத்து விட்டேன். உறங்குவதுற்கு முன் அன்னவள் ஞாபகம் வரவே, எவ்வளவு செலவானாலும் பரவாயில்லை என சீனா விடுதியிலிருந்து தொலைபேசியில் அழைத்து, நடந்ததை கூறிவிட்டு, "இனி போன் செய்கிறேன் தாயே" என உறுதி சொல்லிவிட்டு குருநாதரை வணங்கி உறங்கிப் போனேன். மறுநாள் காலை அந்த ப்ராஜெக்ட் லீடரிடம் சென்று இனி ஆகவேண்டியது என்ன? என்று ஆலோசனை கேட்டேன். அவர் சிறிது யோசித்துவிட்டு, இப்போது ஒருமுறை சுவிட்ச் ஆன் செய்து பார், என சொன்னார். நூறுமுறை முயற்சி செய்தும் பலனில்லை, இப்போது மட்டும் என்ன ஆகிவிடப் போகிறது என நொந்துவிட்டு, அவர் கூறியதர்காக கடைசியாக சுவிட்ச் ஆன் செய்தேன். 

என்ன ஆச்சர்யம் ? லேப்டாப் எந்தக் குறையுமில்லாமல் வெகு சிறப்பாகச் செயல்பட்டது !!!!   ஓம் அகத்தீசாய நமஹ என வணங்கிவிட்டு எதைப் பற்றியும் கவலைப்படாமல் முதல் வேலையாக அன்னவளை தொடர்பு கொண்டு பேசிவிட்டு என் பணியைத் தொடர்ந்தேன்.

   அன்னவள் பிராத்தனைக்கு மட்டும் அய்யா அப்படியென்ன முக்கியத்துவம் கொடுக்க வேண்டும் ? யோசித்துப் பார்த்ததில் ஒரே ஒரு விசயத்தில் மட்டும் தான் அன்னவள் உறுதியோடு இருக்கிறாள் என்று தெரிகிறது.  அன்னவள் ராம்நாடு மாவட்டத்தில் ஒரு பிரபல அசைவ உணவகம் நடத்தும் குடும்பத்தில் பிறந்தவள். அவள் பிறந்ததிலிருந்தே தினமும் கறி, ஈரல் என அவளின் தந்தையார், இரவு பகல் பாராமல் ஊட்டி வளர்த்திருக்கிறார். ஆனால் இன்று அன்னவள், மஹாசித்தர் அகத்தியரை வணங்கும் காரணத்திற்காக அசைவ உணவை தியாகம் செய்துவிட்டாள். நான் பலமுறை அறிவுறுத்தியும் ஒரு கோழி முட்டை கூட சாப்பிடமாட்டேன் என உறுதியாகக் கூறிவிட்டாள். அவள் பிராத்தனை மிக எளிதாகினும் அது உள்ளப் பூர்வமானது. அதுவே அன்னவளை அய்யாவின் செல்ல மகளாக வைத்திருக்கிறதுபோலும்.

   இதைப்படிக்கும் நண்பர்கள் பலருக்கும், இது நல்ல கற்பனை அல்லது எதேசையான மனோவியல் என்றே தோன்றும். அதில் தவறொன்றுமில்லை, எதையும் கட்டாயம் நம்பவேண்டும் என்ற அவசியம் யாருக்கும் இல்லை. ஆனால், சில நுட்ப்பமான இறைஅலைகளை பெண்கள் எளிதில் உணர்ந்து விடுகிறார்கள்.  இந்த பதிவை என் சகோதரியிடம் காட்டிவிடுங்கள் என உங்கள் மைத்துனன் என்ற உரிமையில் அடியவன் கேட்டுக் கொள்கிறேன். ஒரு புத்திசாலிப் பெண் எந்த சூழ்நிலையையும் நல்ல வழியில் அருளோடு சமாளித்து விடுவாள். நன்றி.

இவன்,

அகத்திய பக்தன்

சூப்பர் ஹீரோ... சூப்பர் ஹீரோ...

சூப்பர் ஹீரோ... சூப்பர் ஹீரோ..


கடந்த வாரம், எனக்கு தெரிந்தவரின் மகனை எதேச்சையாக காண நேர்ந்தது. அவன் பள்ளி முடித்து சமீபத்தில் கல்லூரி சேர்த்திருக்கிறான். முன்பு மிகவும் ஒல்லியாக இருந்தவன் திடீரேன சதைபிடிப்பாக இருந்தான். நேர்மையாக வளர்ந்த உடலாக தெரியவில்லை. பீர் மற்றும் சாராய பானங்கள் குடித்து, அதன் ஆரம்ப கட்ட விளைவாக ஒரு வாலிபனின் உடல் பளபளப்பாக நன்கு சதை ஏறியதுபோல் நமக்கு தெரியும். பையன் அடிக்கடி மாலை இரவு நேரங்களில் வீட்டிற்கு வரமாட்டான். ஜிம் செல்கிறேன் என்பான். பீர் குடித்தால் நல்ல சதைபிடிப்பாக அழகாக மாறலாம் என அவனது சக நண்பர்கள் மூளைச்சலவை செய்திருப்பார்கள். எனது கல்லூரி காலத்தில் இப்படி மது அருந்த ஆரம்பித்தவர்கள், இப்போது குடிகாரர்களாக மாறியிருக்கிறார்கள்.  இவர்களை எப்படி திருத்துவது என தெரியாமல் அவர் சொந்தங்கள் புலம்புவது மிகவும் பரிதாபத்திற்குரியது. இதற்கு ஒரு நல்ல எளிய மருந்து இல்லையா ? என நான் பலமுறை என்குருவை வணங்கி பிராத்தித்திருக்கிறேன். குரு அருளால் இரண்டு நல்ல எளிய மருத்துவ குறிப்புகள் கிடைத்திருக்கிறது. அதை தெரிவிக்கவே இந்த பதிவு. உங்களுக்கு வேண்டியவர் யாரேனையும் காப்பாற்ற விரும்பினால், உங்கள் இஷ்ட்ட தெய்வத்தை அல்லது குருவை வணங்கி இந்த மருந்தை கொடுங்கள். இறைவன் அருளால் அவர் குடும்பம் காப்பாற்றப்படும்.

எல்லாம் சரிதான்! ஆனால், இதில் எனக்கு என்ன பாதிப்பு அல்லது தொடர்பு ? என நீங்கள் யோசிப்பது தெரிகிறது.

எனது சிறுவயதில், கோவை மாவட்டம் சூலூரில் கழிந்தது. அப்போது, எனது தந்தை சூலூர் விமான படை நிலையத்தில் பணிசெய்தார். என் தந்தைக்கு இரண்டு மனைவிகள். இரண்டு தாயாருக்கும் சேர்த்து அப்போது ஆறு குழந்தைகள். அடியேன் நான்தான் மூத்தவன். எனது கொள்ளு பாட்டி கோட்டையம்மாளும், அப்பத்தா மீனாக்ஷி அம்மாளும் எனக்கு ஆன்மிகத்தையும் அன்பையும் புகட்டி வளர்த்தார்கள். அவர்கள் என் சிறு வயதிலேயே,  இரண்டு குடும்பத்தையும், இரண்டு தாய் குழந்தைகளிடமும் பாரபட்சம் இல்லாமல் நடந்துகொள்ள வேண்டும் என சொல்லி சொல்லி வளர்த்தார்கள். இரண்டு குடும்பத்துக்கும் தேவையான அரிசி, பருப்பு, மளிகை, மாமிசம் மற்றும் எரிபொருள் என அணைத்து பொருட்களையும் மூத்தவன் என்ற பொறுப்பில் நானே அளந்து பிரித்து கொடுக்கும் பொறுப்பை தந்தை எனக்கு கொடுத்தார். எனது சிறிய அன்னை தன் மகன்களை விட அதிக அன்பை என்மீதே வைத்திருந்தாள்.

என் தந்தை சராசரி மனிதனுக்கும் மேலான அதீத புத்திசாலி, திறமைசாலி, பலசாலி, பல மொழிகள் அறிந்தவர், கவிஞர், தத்துவவாதி, ஆன்மிக நம்பிக்கையாளர், எழுத்து மற்றும் பேச்சாற்றல் நிறைந்தவர். எனக்கு அவரைப்போல் பத்தில் ஒரு பங்கு திறமைகூட கிடையாது. எனது தாயாருக்கு ஒரு தையல் நிலையம், எனது சிறிய தாயாருக்கு ஒரு செருப்பு கடை மற்றும் அவர் கூடுதலாக தனக்கு ஒரு மெக்கானிக்கல் ஒர்க் ஷாப் வைத்து நடத்தினார். இது போக, அவ்வப்போது டெல்லி சென்று நெறைய எந்திரங்கள் வாங்கி வந்து விற்பார். "ஓங்கி அடிட்ச்சா ஒன்றை டன் வெயிட்டுடா!" என சினிமா வசனம் கேள்விபட்டிருப்போம், ஆனால் உண்மையில் அப்படி ஒரு மனிதன் இருக்க முடியுமா என்ற கேள்வி எழும். ஒரே சமயத்தில் பத்து ஆண்களை தூக்கி வீசும் மனோபலமும் உடல்பலமும் தந்தைக்கு இருந்தது.

அவ்வப்போது இரண்டு பொண்டாட்டி பிரச்சனை சிறிது வரும், மற்றபடி வாழ்க்கை பெரிய அளவில் பிரச்சனைகள் இல்லாமல் சென்றது. நான் எட்டாம் வகுப்பு படிக்கும் காலகட்டத்தில், தந்தையருக்கு வாரக்கடைசியில் மட்டும் (வெள்ளிக்கிழமை ராமசாமி ) நண்பர்களுடன் மது அருந்தும் பழக்கம் ஆரம்பித்தது. ஆறு மாதகாலங்களில் தினசரி மாலைநேரம் மட்டும் மது அருந்தும் பழக்கம் வந்தது. சில மாதங்களில், பகல் குடிகாரனாகவும் ஆனார். மேலும் சில மாதங்களில் அவர் ஒரு முழுமையான இந்திய “குடிமகனாக” மாறிவிட்டார். ஆரம்பத்தில் குடித்துவிட்டு அமைதியாக இருந்தவர், பிறகு தினசரி வீட்டில் ரகளை கலாட்டா கச்சேரியானது.

குடிபோதையில் எப்போது என்ன செய்வர், எப்படி சண்டை வரும், என அனுமானிக்கமுடியாமல் பயத்திலும் வெறுப்பிலும் வாழவேண்டியிருந்தது. தலையணைக்கடியில் கத்தி அருவாளை வைத்து அவர் தூங்கினால், நாங்கள் எப்படி நிம்மதியாக உறங்குவது? அவ்வப்போது இரண்டு நாட்களுக்கும் மேலாக அவர் வீடு திரும்பவில்லையெனில், எனது தாயார்  என்னை எங்கேனும் அவரை தேடிவர சொல்லுவார். சிறுவன் நானும் ஒவ்வொரு ஒயின் ஷாப், சாகனா கடைக்காரிகளின் வீடுகள்,  மேற்படி வீடுகள் என சென்று, 'என் அப்பா வந்தாரா?' என கேட்டு தேடி வரவேண்டும். என்ன செய்ய? இரண்டு குடும்பமும் தவிக்கிறதே?

எனக்கு பள்ளி படிப்பு முடியும்வரை எப்படியோ சமாளித்துவிட்டு, பின்பு தாய்மாமா தயவை நாடிசென்றுவிட்டோம்.

பின்பு, அவர் யாருக்கும் பிரயோஜனம் பொறுப்பு இல்லாமல் குடித்து குடித்து, கடந்த 2012 ஆம் வருடம் இறந்துபோனார். இங்கு மூன்று முக்கிய விஷயங்கள் உள்ளது. ஒன்று-, சிறிதாக ஆரம்பிக்கும் குடிப்பழக்கம் எவ்வளவு திறமையானவனையும் அழித்துவிடும். இரண்டு-, ஒருவன் நிறைய திறமைகளோடு சூப்பர் ஹீரோவாக இருக்கிறான் என்றால், எங்கோ "ஆப்பு" இருக்கிறது என்று அர்த்தம். மூன்று-, ஒருவன் சராசரிக்கும் குறைவான மனிதனாக இருந்தாலும் இறைவனை வணங்கி ஒழுக்கமான வழியில் இறுதிவரை வாழ்ந்தால், அதுவே மிக மிக பெரிய சாதனையாகும். அந்த ஒழுக்கமுள்ள மனிதனே மிகவும் உயர்ந்தவன் சாதனையாளன்.

ஒரு சாப்ட்வேர் அனலிஸ்ட்டாக, வாழ்வின் இந்த கொடிய பக்கங்களில் பின்னே ஓடிய "லாஜிக்" (சூட்சமம்) என்ன ? என நான் என் ஜாதகத்தை சமீபத்தில் புரட்டினேன். இது சனி திசையின் பத்தொன்பது வருடங்கள் என பார்த்து ஆச்சர்யப்பட்டேன். எது எல்லோர்க்கும் இந்த அளவு வீரியமாக இருக்குமா? இல்லை இல்லை.   இது அவரவர் ஜாதகத்தில் இருக்கும் சுப கிரகங்களின் நல்ல பார்வையை பொறுத்து வீரியம் குறையும். அடியேன் எனக்கு எந்த சுப கிரகமும் அருள்செய்யாததால், பாவ கிரஹங்கள் எல்லாம் கூடி குத்தாட்டம்போட்டுவிட்டது. இதை படித்துவிட்டு, எனக்கு ஜோசியம் தெரியும் என நம்பவேண்டாம். இது அனைத்தும் என் அருமை நண்பர் சேதுபதி எனக்காக அலைந்து திரிந்து கொடுத்த விஷயங்கள்.

ஏதோ மருந்து சொல்கிறேன் என்றுவிட்டு, சொந்தக்கதையை சொல்லுகிறானே! என நீங்கள் யோசிப்பது புரிகிறது. வெறுமனே அறிவுரை சொல்வது வீண்தான், சொந்த அனுபவத்தை சொல்லிவிட்டால் உங்கள் ஆழ்மனதில் பதிந்துவிடும் என்ற நம்பிக்கை தான். சரி விசயத்திற்கு வருவோம்.

குருவருளால், ஒரு அற்புதமான சித்த வைத்திய மருந்து உள்ளது. "கேழ்விரகு பற்பம்". இதன் செய்முறை சிறிது சிக்கலானது. ஆனால் மிகக்குறைந்த விலையில் நல்லெண்ணத்தோடு திரு. சதுரகிரி ஹெர்பல்ஸ் கண்ணன் அவர்கள் இதை தயார் செய்து விற்கிறார். கீழே உள்ள இணைய இணைப்பில் மேலும் அதிக விபரங்கள் உள்ளது. இதன் செய்முறையை பார்த்து கலங்கவேண்டாம், கண்ட சாக்கடை தண்ணிக்கு அடிமையானவருக்கு இந்த மருந்தை, இறைவன் கருணையோடு கொடுத்திருக்கிறார். உங்களுக்கு வேண்டியவரை காப்பாற்ற நினைத்தால், உங்கள் இஷ்ட தெய்வத்தை வணங்கி மருந்தை கொடுக்க சொல்லுங்கள். திரு. சதுரகிரி ஹெர்பல்ஸ் கண்ணன் அவர்கள் மிகவும் பிஸியானவர். போனில் காத்துக்கிடப்பதை விட, சதுரகிரி சென்று "சுந்தர மகாலிங்க" தரிசனமும் செய்துவிட்டு, மருந்தையும் வாங்கி வருவது சிறப்பானது. இதில் மதச்சார்பு என்று எதுவும் இல்லை. எல்லாம் வல்ல இறைவன் எல்லோரையும் கருணையோடு பார்க்கிறான்.

http://blog.sathuragiriherbals.com/2016/10/blog-post_21.html

   அகத்திலே தீயாக வந்து, கொடிய பாவங்களை போக்கி அருளும் என் ஞானத்தந்தை மகத்துவம் பொருந்திய அகத்திய மகாமுனி உங்கள் அனைவரையும் நல்வழியில் அருள் செய்வார், என வணங்கி அடுத்து ஒரு வித்தியாசமான பதிவில் சந்திபோம் என விடை பெறுகிறேன்.



இவன்,

அகத்திய பக்தன்,

பிரம்மேந்திரன் கலைச்செல்வி

புண்ணியத்தின் பற்றாக்குறை

  விலை மலிவானது அல்லது இலவசமானது, மிக எளிதாக எங்கும் கிடைப்பது என்னவென்று உங்களுக்கு தெரியுமா ?  உடனே உங்கள் மூளைக்குள் அநேக மின்சார பொறிகள் பாய்ந்து பல விடைகளை தருவதை என்னால் புரிந்துகொள்ள முடிகிறது. உங்கள் விடை சிலவேளை தவறாக போகலாம். எனக்கு தெரிந்தவரை மிக மிக மலிவாக கிடைப்பது "அறிவுரை" தான். நீங்களும் இதை சரியென்பீர்கள் என நினைக்கிறேன். எனவேதான், நான் அறிவுரை கூறுவதை முடிந்தவரை குறைத்துவிட்டு, என் சொந்த அனுபவத்தில் நான் நேரடியாக உணர்ந்ததை மட்டும் எனக்கு மிகவும் நெருங்கியவர்க்கு மட்டும் பகிர்வது என கவனமாக உள்ளேன். அநேக மனித ஜென்மங்கள் கர்மா என்னும் விதியின் கையில் சிக்கி அதன் போக்கிலேயே வாழ்கிறார்கள். இதில் யாரையும் திருத்தவேண்டும் என்ற அவசியம், யாருக்கும் இல்லை. திருத்தநினைப்பவனே யோக்யனா? என்பது கேள்விக்குறி. மனிதக்கூட்டத்தில் நூற்றில் ஒருவனுக்கு மட்டும் சரியான வழிமுறைகள் சரியான நேரத்தில் போய்சேர்க்கிறது. அதை அவன் ஆழ்மனம் "இது சரியான வழிமுறைதான்! " என மனதார ஏற்றுக்கொண்டு அவனை நல்ல வழியில் மாற தூண்டுகிறது. எனவேதான் நான் ,  என்பதிவுகளை படிப்பவரின் பாராட்டுக்கும், லைக்குகளுக்கும் ஆசைப்பட்டு "இதற்குத்தானே ஆசைப்பட்டாய் பாலகுமாரா" என ஏங்கிப்போகாமல் கவனமாக இருக்க முயற்சிக்கிறேன்.

அப்பாவி ஏழைகள் கந்துவட்டியால் பாதிக்கும்போது மனம் வேதனைப்படுகிறது. அதைவிட மனதை மிகவும் பாதிக்கச்செய்வது பெண்கள் மற்றும் பெண்குழந்தைகளுக்கு எதிரான வன்கொடுமை. எங்கோ எந்தப்பெண் பாதித்தாலும், என் மகளே! என மனம் வேதனைப்படுகிறது. தொடர்ச்சியான எண்ண ஓட்டங்கள் தூக்கத்தை கெடுத்து சோர்வை கொடுக்கிறது. இதற்கொரு முடிவென்ன என்று சிந்தித்து, என் குருநாதர் முன் மண்டியிட்டு, "அப்பா, இதுயென்ன கொடுமை? நான் ஏன் தொடர்ச்சியான எண்ண ஓட்டத்தில் சிக்கிக்கொள்கிறேன்? என்னால் என்ன செய்யமுடியும்? என்னிடம் உள்ள குறைபாடா? எப்படி எதிர்கொள்வது? " என பணிந்து கேட்டேன். பற்றவைத்த நெய்விளக்கின் தீபம் மேலும் சிறிது உயர்ந்து பிரகாசத்துடன், ஆழ்மனதில் இருந்து வரிகள் வர ஆரம்பித்தது. //என் மகனே! அவரவர் கர்மா வினைப்படி அவரவர் வாழ்க்கை போய்க்கொண்டிருக்கிறது.

ஒருவனுக்கு பணம் தேவைப்படும்போது, கந்துவட்டிக்காரன் கடவுளாக தெரிவான். எப்படியாவது கேட்ட பணம் கிடைக்கவேண்டும் என பிராத்தனை செய்து சென்று கந்துவட்டி வாங்குவான். வட்டிக்காரன் பணம், சொத்து, மானம் என உருவிக்கொண்டே இருப்பான். பின்பு, கடவுளாக தெரிந்த கந்துவட்டிக்காரன் எமனாக தெரிகிறான். ஹ்ம்ம்... எமன் கூட கடவுள் தானே !!!

கந்துவட்டிக்காரனிடம் கேட்ட பணம் கிடைத்தவுடன், என் "அதிஷ்டம்" பணம் கிடைத்தது என்பான். மானத்தையும் உயிரையும் விடும்போது "பாவி" என்பான்.   என் மகனே! நீ பாவம் எது என ஆழ்ந்து சிந்திப்பதிலோ, சஞ்சலப்படுவதிலோ என்ன பலன்? நீ இது இது பாவம் என்று யாரிடம் சொன்னாலும் உனக்கு பகைதான் வரும். சிந்திப்பதற்கும் செயல்படுத்துவதற்கு மிகவும் எளிதான ஒன்று உள்ளது. அணைத்து மனிதர்களிடமும் பெருவாரியாக தென்படுவது "புண்ணியத்தின் பற்றாக்குறை"!!!.

நீயும், உன் நெருங்கிய நண்பர்கள் மற்றும் உறவுகளும், இன்று நல்ல படிப்பிலும், நல்ல தொழிலாலும் முன்னேறியிருப்பது எதனாலே ? என்றோ நீங்களும் உங்கள் முன்னோராலும் செய்யப்பட்ட புண்ணியமும் தானடா.   மனிதர்கள், தான் அதிகம் அதிகம் சேர்க்கும் பணமும் சொத்தும் தன் சந்ததிக்கு முழுமையான பாதுகாப்பையும் நல்வாழ்வையும் அளித்துவிடும் என நம்புவது வேடிக்கையாக உள்ளது. இவர்கள் மறந்து விட்ட மறுத்துவிட்ட விஷயம் "புண்ணியத்தின் பற்றாக்குறை". மேற்கொண்டு உன்புத்தியால் புரிந்துகொள். காட்சிகளை கண்டு கலங்க வேண்டாம். உன்னாலான தான தர்மங்களை பிரதிபலன் பார்க்காமல் செய்து உன்வழியில் போய்க்கொண்டே இரு. நீ விரும்புவோருக்கும் "புண்ணியத்தின் பற்றாக்குறை" பற்றி சொல்லலாம்.  ஆனால், பாவத்தைப்பற்றி விரிவாக பேசினால் தேவையில்லாத வம்புதான். ஒவ்வொரு வினைக்கும் எதிர்வினை உண்டு.// என முடித்துக்கொண்டார்.

இன்றைய காலகட்டத்தில் இதுதான் பாவச்செயல் என அறுதியிட்டு கூறுவது மிகவும் சிக்கலான காரியம். "தர்மம் செய்ய செய்ய கர்மத்தின் வினை குறையுமப்பா" என்ற குருவின் வரிகளை எங்கோ படித்த ஞாபகம் வருகிறது. "பண வசதி உள்ளவன் தான தர்மம் நன்கு செய்யலாம், வசதியில்லாத நான் ஏன் செய்ய வேண்டும்?" என உங்களில் சிலர் யோசிப்பதை என்னால் புரிந்துகொள்ள முடிகிறது. தர்மம் செய்ய பணத்தைவிட மனம் முக்கியம். 1995 இல் எனது கல்லூரி படிப்பு செலவிற்காக திண்டுக்கல்லில் பகுதி நேர வேலை செய்வேன். மாதம் ரூபாய் 800 சம்பளம். எனது செலவுபோக குறைந்தது ரூபாய் ஐம்பது மிச்சம் செய்து மணிஆர்டர் மூலம் "உதவும் கரங்கள், சிவானந்த குருகுலம்" போன்ற ஆதரவற்றோர் அசிரமங்களுக்கு அனுப்புவேன். அது அற்புதமான மனநிறைவை தரும். ஏதோ பெரும் சக்தி என்னை சூழ்ந்து அருள்வதை உணரமுடியும். இந்த சுகத்தை இன்றுவரை அனுபவிக்கிறேன். ஒரு நிமிடமேனும், 137 பெண்குழந்தைகளுக்கு தாய் தகப்பனாக என் மனைவியும் நானும் அங்கு நிற்க்கும் பாக்கியம் குரு அருளால் கிடைக்கிறது.

 உங்களுக்காக இல்லாவிட்டாலும், நீங்கள் விரும்பும் உங்கள் சந்ததிக்காகவேனும் "புண்ணியத்தின் பற்றாக்குறையை" ஈடு செய்து வளமோடு வாழ குருவை வணங்கி வாழ்த்துகிறேன்.

வறியார்க்கொன்று ஈவதே ஈகைமற்று எல்லாம்
குறிஎதிர்ப்பை நீரது உடைத்து
(அதிகாரம்:ஈகை குறள் எண்:221)

பொழிப்பு (மு வரதராசன்): வறியவர்க்கு ஒரு பொருளைக் கொடுப்பதே ஈகை எனப்படுவது. மற்றவர்க்குக் கொடுப்பதெல்லாம் பயனை எதிர்பார்த்துக் கொடுக்கும் தன்மை உடையது.

இவன்,

அகத்திய பக்தன்,

பிரம்மேந்திரன் கலைச்செல்வி

தனித்துவா... தயங்காதே...

                  தனித்துவா... தயங்காதே...

சதுரகிரி மலைக்கு யாத்திரை செய்ய பல நாள் வேண்டுதல். அடிக்கடி சதுரகிரி செல்லும் எனது மனைவியின் மூத்த சகோதரர் பூமிநாதன் மைத்துனரிடம், என்னை ஒருமுறை பவுர்ணமிக்கு அழைத்துச் செல்லுமாறு வேண்டியிருந்தேன். பவுர்ணமிக்கு முதல் நாள் அவர் தவிர்க்கமுடியாத காரணத்தால் வர இயலாது என கூறிவிட்டார். மிகுந்த வருத்தத்தோடு இருக்கையில், என் மனைவி, "பல உலகநாடுகளுக்கு பணி நிமித்தமாக தனியாக செல்லும் உங்களால் நம் நாட்டில் இருக்கும் சதுரகிரிக்கு தனியே செல்லமுடியதா ? " என்றவுடன் எனக்கு சுருக்கென்று உதித்தது. உடனே தனியே கிளம்பிவிட்டேன். கோவை டு மதுரை டு க்ரிஷ்ணன்கோவில் டு தண்டிப்பாறை காலை 5 :30 AM மணிக்கு வந்துவிட்டேன். காலைக் கடன் முடித்து சதுரகிரிமலை ஏற ஆரம்பித்தேன். போகும் வழியி நீர்விழ்ச்சியில் அருமையான குளியல். அங்கங்கே ஐந்து ஆறு சொட்டு தேன் மற்றும் ஒரு மடக்கு சதுரகிரி நீர் அருந்தி சரசரவென்று, ஓம் அகதீசாய நமஹ என்று மனதில் ஜபித்தபடி நான்கு மணி நேரத்தில் காலில் செருப்பு இல்லாமல், உணவு இல்லாமல், வெறும் தேனும் சிறிது நீரும் மட்டும் அருந்தி வெகு சுலமபாக குரு அருளால் கோவிலுக்கு வந்து விட்டேன்.  காலை நேரம் சுந்தர மகாலிங்க தரிசனம் மிக மிக அற்புதமாக இருந்தது. கூட்டம் இல்லாமல் சத்தம் இல்லாமல் இருந்தது. கோவிலிலேயே இருபத்தைந்து  நிமிடத்திற்கு மேலாக தரிசனம், தியானம் என அருமையாக இருந்தது. பின்பு சந்தன மகாலிங்க தரிசனமும் இருபது நிமிடம் மிகவும் மென்மையாக கிடைத்தது. 

உண்மையில் நான் பவுர்ணமி இரவு தங்கிவிட்டு மறுநாள் கிளம்பலாம் என்ற திட்டத்தில்தான் வந்தேன். ஆனால் என்மனதில் "தரிசனம் மிக பூரணமாக கிடைத்துவிட்டதே, உடனே இறங்கிவிட தூண்டியது". மலைஇறங்க மனமில்லாமல் குருநாதரை வேண்டிக் கொண்டு இறங்கலாமா? தங்கலாமா? என குழப்பத்தில் அரை மணிநேரம் பாறைகளில் உட்கார்ந்திருந்தேன். மதியம் பனிரெண்டு மணி உச்சி வெய்யில் கொளுத்தியது. என்னை ஈன்ற அகத்தீசரே! தங்கிவிடவா? என மனிதில் ஏங்கி கேட்டேன். ஆனால், ஆழ்மனதிலிருந்து "உனக்கான தரிசம் கிடைத்துவிட்டது. இறங்கு" என்றது. இறங்க மனமில்லாமல் அமர்ந்திருந்தேன்.  திடீரெனெ அற்புதமான நறுமணத்துடன் ஒரு குளிர்ந்த தென்றல் என்னை தழுவியது. அந்த கொளுத்தும் உச்சி வெயிலில் வந்தது என் தந்தை அகத்தீசர் என்று உணர்ந்து மனம் தெளிந்து மலை இறங்க ஆரம்பித்தேன். மலை முடிவிற்கு இருபது நிமிடம் முன்பாக திடீரெனெ கடும் மழை பெய்தது. மழையில் நன்கு நனைந்தேன். அனைத்து உடைகளும் ஈரமாகி கனமானது. "இறங்கு" என்று முதலில் சொல்லியபோதே இறங்கியிருந்தால் இந்த நிலை வந்திருக்காது. எப்படியோ பேருந்தில் சிறிது காயவைத்து நல்லபடியாக நடு இரவில் கோவை வீடு வந்துசேர்ந்தேன்.
சதுரகிரி பயணத்திற்கு நன்றி தெரிவிக்க, அதே வாரம் சனிக்கிழமை குடும்பத்தோடு "வெள்ளகோவில் அகத்தியர்" கோவிலுக்கு சென்றோம். அகத்தியரின் நல்லாசிகளை பெற்றுவிட்டு கோவில் பெரியவரிடம் அளவளாவிவிட்டு மாலை ஐந்து மணிக்கு கிளம்பினோம். வரும் வழியில் காங்கேயம் அருகில் "சிவன் மலை" கோவிலுக்கு செல்ல மனதில் தூண்டியது. மழை சிறிது தூறுகிறது, இருட்ட ஆரம்பிக்கிறது, வீடு செல்ல இன்னும் இரண்டரை மணி நேரம் வாகனம் ஓட்டவேண்டும்.  ஆனாலும் ஏனோ "சிவன் மலை"  செல்ல எனக்கும் என் மனைவிக்கும் அழுத்தமாக தோன்றவே, "சிவன் மலை" எங்கள் வாகனத்திலேயே மேலே ஏற ஆரம்பிதோம். மழை நின்றது. கோவிலுக்குள் நுழையும்போதே மேளதாளம் ஒலித்தது. அது ஒரு சுப்பிரமணியர் கோவில். அன்று புரட்டாசி கடைசி சனியென்பதாலோ என்னோவோ கோவிலில் ஐந்து ஆறு பேருக்கு மேல் யாரும் இல்லை. மூலஸ்தானத்தில் மிக சௌகரியமாக நின்று பார்க்க முடிந்தது. என் கடைக்குட்டி சாய் ஹரிதா மூலஸ்தானத்திற்கு எதிரிலேயே விளையாட்டாக உட்கார்ந்து விட்டாள். யாரும் எதிர்க்கவில்லை. முருகப்பெருமானுக்கு அனைத்து அபிஷேகங்களும் முறையாக கண்குளிர நடந்தது. குருநாதர் எங்களுக்காகவே ஏற்பாடு செய்ததுபோல் ஆச்சர்யமாக இருந்தது. முருகனை வணங்கிவிட்டு, குருநாதருக்கு மனமார நன்றி கூறி வீடு வந்து விட்டோம். இரண்டு நாட்களிலேயே எனது மூத்தமகள் குருநாதரின் நட்சத்திரத்திலேயே பூப்பெய்தி விட்டாள்.
நானும் என் மனைவியும் அகத்தீசரிடம் "தந்தையே! நீங்களே இந்த குடும்பத்தின் மூத்த தலைவர். நீங்களே வைத்தீஸ்வரன். நீங்களே எங்கள் குலதெய்வம். நீங்களே அனைத்து கிரகங்களையும் இயக்குபவர். நீங்களே அவளை நல்லாசி வழங்கி அடுத்து என்ன செய்வதென அருள வேண்டும்" என்று வேண்டிக் கொண்டோம். மனதில், பிரபல இயற்கை உணவு மருத்துவர் கோவை R .S அவர்களை தொடர்பு கொண்டு ஆலோசனை கேட்க தோன்றியது. மருத்துவர்  R .S  தனது வாழ்த்துக்களை தெரிவித்துவிட்டு, தினமும் 70 %  பழங்களும், வாழைப்பூ மற்றும் பிஞ்சு வாழைக்காய் சமைத்து தர வலியுறுத்தினார். 
மேலும் இணையத்தில் தேடிய தகவல்கள் கீழே உள்ளது. எனினும், இயற்கை உணவு மருத்துவரை ஆலோசிப்பதே சிறந்த வழி.
<<< 
இப்போதும் கிராமங்களில் பூப்பெய்தும் இளம் பெண்ணுக்கு, உளுத்தங்களியும் உளுந்து வடையும் தருவது ஒரு சடங்காகவே நடைபெறுகிறது. நாகரிகத்துக்கு மாறிப்போன நகரத்துப் பெண்களுக்கு அதெல்லாம் தெரியாமல் போனதன் விளைவுதான், ‘இடைப்பூப்பு’ எனப்படுகிற மாதவிலக்கு சுழற்சியின் இடையிடையே ஏற்படுகிற உதிரப் போக்கும், கர்ப்பப்பை பலவீனமும்... கருப்பையின் உள்வரிச் சுவர் முறையாக உருவாகாமையாலும், அது உதிர்ந்து, முறையாக வெளியேறாத ‘தோஷ நிலை’தான் இதற்குக் காரணம். உளுத்த கர்ப்பப்பையை உரமாக்கி, மேற்சொன்ன பிரச்னைகளை சரியாக்க ஒரே மருந்து உளுந்து.


வாழைப்பூ வாங்கும் போது, ஒரு நிமிடம் அதை உற்றுக் கவனியுங்கள். கர்ப்பப்பையின் வடிவிலேயே இருப்பது தெரியும். வடிவில் மட்டுமின்றி, குணத்திலும் அது கர்ப்பப்பைக்கு நெருக்கமானது. வாழைப்பூவை அதன் துவர்ப்புச் சுவை மாறாமல் கூட்டாகவோ அல்லது வடையாகவோ செய்து வாரம் 2-3 முறை சாப்பிடுவது, அதிக ரத்தப்போக்கைக் கட்டுப்படுத்தும்.
உங்கள் வீட்டுக்கு கீரை கொண்டு வரும் அம்மணியிடம், அடுத்த முறை ‘இம்பூரல்’ இலை எடுத்துவரச் சொல்லுங்கள். அதை லேசாக எண்ணெயில் வதக்கி, உளுத்தம் பருப்பு,  மிளகு வறுத்துச் சேர்த்து, கல் உப்பு வைத்து அரைத்து, எலுமிச்சைச்சாறு சேர்த்து துவையலாக அரைத்துக் கொடுங்கள். மகளை மிரள வைக்கிற மாதவிலக்கு பிரச்னைகள் ஓடியே போகும்.
அடுத்தது மாதவிலக்கு நாள்களில் உண்டாகிற வலி. இதை ‘சூதக வலி’ என்கிறோம். கர்ப்பப்பையும், அதைச் சுற்றியுள்ள தசை நாண்களும் வலுவிழப்பதால், உண்டாகிற தசை இறுகல் வலி இது. இதற்கு மாதுளம் பழம் மிக அருமையான மருந்து. மாதுளம் பழமும் கிட்டத்தட்ட கர்ப்பப்பை வடிவிலும், அதன் பூ நுனியானது கருவாய் வடிவிலும் இருப்பதைக் கவனித்திருக்கிறீர்களா? மாதுளை மணப்பாகு, மாதவிலக்கின் போதான அழற்சியைத் தவிர்த்து, வலியை நீக்கும்.
மாதம் தவறாமல் மாதவிலக்கு வந்தால்தான் ஆரோக்கியம். சிலருக்கு 3 மாதங்களுக்கொரு முறை வரும். திடீரென நின்று போகும். சூதகத் தடை என்கிற இந்தப் பிரச்னைக்குக் காரணம் ரத்தமின்மை.  பனைவெல்லம் சேர்த்த திராட்சைச்சாறும், பனைவெல்லப் பாகில் செய்த கருப்பு எள்ளுருண்டையும் இந்தப் பிரச்னையைக் குணப்படுத்தும்.  கடைசியாக வெள்ளைப்படுதல்... கர்ப்பப்பையை தூய்மையாக வைத்துக் கொள்ளாததே இதற்குக் காரணம். நமது உடலில் அமிலத்தன்மை, காரத்தன்மை என இரண்டு உண்டு.

இரண்டும் சம விகிதத்தில் இருக்க வேண்டும். அமிலத்தன்மை குறைந்து, காரத்தன்மை அதிகரித்தால், உடல் சூடும் அதிகமாகி, வெள்ளைப்பட ஆரம்பிக்கும். பாக்டீரியா, பூஞ்சைத் தொற்றுகளும் சீக்கிரமே பற்றிக் கொள்ளும். இதைத் தவிர்க்க, உணவில் அடிக்கடி வெண்பூசணி, சுரைக்காய், முள்ளங்கி சேர்த்துக் கொள்ள வேண்டும். ‘வயசுக்கு வந்த பொண்ணுங்களுக்கு இதெல்லாம் சகஜம்தானே...’ என இனி எந்தப் பிரச்னையையும் அலட்சியப்படுத்தாதீர்கள் அம்மாக்களே...

உளுத்தங்களி - என்னென்ன தேவை?
கருப்பு உளுந்து - கால் கிலோ,
பனைவெல்லம் - கால் கிலோ,
நல்லெண்ணெய் - 200 மி.லி.

எப்படிச் செய்வது?

உளுந்தை வெறும் கடாயில் வறுத்துக் கரகரப்பாகப் பொடித்துக் கொள்ளவும். பனைவெல்லத்தில் தண்ணீர் விட்டு, பாகு காய்ச்சி, வடிகட்டி, மறுபடி அடுப்பில் வைக்கவும். அதில் உளுந்து பொடியை சிறிது, சிறிதாகச் சேர்த்துக் கிளறவும். நன்கு வெந்ததும், நல்லெண்ணெய் விட்டுக் கிளறி, இறக்கவும்.
வயதுக்கு வந்த பெண்களுக்குக் கொடுத்தால் இடுப்பு எலும்பு வளர்ச்சி பெறும். உடல் மெருகடையும். ரத்தப் போக்கு சிக்கல்கள் தீரும்.


முள்ளங்கி துவையல் - என்னென்ன தேவை?

முள்ளங்கி - 2,
புதினா இலை - 1 கைப்பிடி,
உளுத்தம் பருப்பு - 1 டீஸ்பூன்,
மிளகு - அரை டீஸ்பூன்,
உப்பு - தேவைக்கேற்ப,
நெய் - சிறிது.

எப்படிச் செய்வது?

முள்ளங்கியைத் தோல் நீக்கி, நறுக்கி, நெய் விட்டு வதக்கித் தனியே வைக்கவும். அதே கடாயில் இன்னும் சிறிது நெய் விட்டு  புதினா இலை, உளுத்தம் பருப்பு, மிளகு சேர்த்து வறுக்கவும். முள்ளங்கியுடன் சேர்த்து, உப்பு வைத்து அரைக்கவும். இந்தத் துவையலை சூடான சாதத்தில் பிசைந்து சாப்பிட, மாதவிலக்கு நாள்களில் ஏற்படுகிற வயிற்றுவலியும் சிறுநீர் எரிச்சலும் சரியாகும்.


வாழைப்பூ கூட்டு - என்னென்ன தேவை?

ஆய்ந்து, சுத்தம் செய்து,
நறுக்கிய வாழைப்பூ - 2 கப்,
பயத்தம் பருப்பு - அரை கப்,
வெங்காயம் - 1,
பச்சை மிளகாய் - 2,
மஞ்சள் தூள் - கால் டீஸ்பூன்,
தேங்காய்த் துருவல் - கால் கப்,
சீரகம் - அரை டீஸ்பூன்,
கறிவேப்பிலை,
கொத்தமல்லி - சிறிது, உப்பு,
எண்ணெய் - தேவைக்கேற்ப,
கடுகு - கால் டீஸ்பூன்.

எப்படிச் செய்வது?

பயத்தம் பருப்பை மலர வேக வைக்கவும். தேங்காய், சீரகத்தை நைசாக அரைக்கவும். கடாயில் எண்ணெய் விட்டு, கடுகு தாளித்து, கறிவேப்பிலை, நறுக்கிய வெங்காயம், பச்சை மிளகாய் தாளிக்கவும். பிறகு அதில் வாழைப்பூ, மஞ்சள் தூள் சேர்த்து வதக்கவும். வெந்ததும் பருப்பு சேர்க்கவும். உப்பும், அரைத்த விழுதும் சேர்த்து, அளவாகத் தண்ணீர் விட்டுக் கொதித்ததும் இறக்கி, கறிவேப்பிலை, கொத்தமல்லி தூவிப் பரிமாறவும்.மாதவிலக்கு தொடர்பான அத்தனை பிரச்னைகளுக்கும் இது மருந்து.
முதலாவது பீரியட் மட்டுமல்ல ஒரு 6 பீரியட்டாவது அவர்களை விசேடமாக கவனிக்கவேணும்
நிச்சயம் பத்தியச் சாப்பாடு மூன்று கிழமைக்குத் தன்னும் தொடர்ந்து கொடுக்க வேண்டும்.
பருவம் அடைந்தவுடன் வேப்பிலைக் குருத்துடன் மஞ்சளும், சர்க்கரையும் அரைத்து, காலையில் இரண்டு நெல்லிக்காய் அளவு கொடுக்க வேண்டும்.
சுத்தமான நல்லெண்ணை ஒரு மேசைக் கரண்டி காலையில் கொடுக்க வேண்டும்.
உழுந்தையும், சின்ன சீரகத்தையும் அரைத்து நல்லெண்ணை தோசை சுட்டுக் கொடுக்க வேண்டும்.
கத்தரிக்காய் பொரியல், முட்டைப் பொரியல் போன்றவற்றை உணவில் தினமும் சேர்க்க வேண்டும்
இவைகளை ஒழுங்காக கொடுத்து வந்தால்... பிற்காலத்தில் மாதவிடாய் ஏற்படும் காலங்களில், அவர்களுக்கு வயிற்றுக் குத்து, வயிற்று நோய் போன்றவை ஏற்படாது.

உழுந்தில் செய்த களி,உழுத்தம் புட்டு,பலகாரம்,எள்ளுப் பாகு,எள்ளுப் பலகாரம்,நல்லெண்ணெயில் பொரித்த முட்டை,கத்தரிக்காய் பொரியல்,கோழியில்,மீனில் சரக்கு கறி போன்றன கொடுப்பார்கள்...பிறகு மாத விடாய் வரும் காலங்களில் இச் சத்தான சாப்பாடே பெண்ணுக்கு கை கொடுக்கும்...அதிக வலி ஏற்படாமல் தடுக்கும்.

>>> 

வீட்டில் ஒரு மாதத்திற்க்கு விளக்கு வைக்கக் கூடாது என்று சொந்த பந்த கட்டளை. அதில் ஒன்றும் எனக்கு கவலை இல்லை. ஏனெனில், கற்கால மனிதன் குகைகளில் சிக்கி முக்கி கல்லை உரசி தீ உண்டாக்கியது போல், உள்ளத்தில் சந்திரனையும் சூரியனையும் உரசி உள்ளொளி தீபம் ஏற்றி வழிபட அகத்தீசர் அவர் அன்பு மகன் எனக்கு அருளியிருக்கிறார்.

"ராஜாதி ராஜ, ராஜரிஷி திலக, 
வீராதி வீரன், சூரனை விழுங்கியவன், 
வர்மக்கலை தெய்வம், கும்பமுனி தேவன், 
வைத்தீஸ்வர நாதன், ஜோதிட ஆசான், தலையாய மஹாசித்தன், முத்தமிழ் வேந்தன், 
தமிழ் இலக்கணத்தின் தந்தை, சகலகலா வல்லவன்,
அப்பனுக்கு பாடம்சொன்ன சுப்பனின் சிறப்புமைந்தன்,
மகத்துவம் பொருந்திய அகத்திய மகாமுனி! பராக் பராக் பராக்".

மேலேயுள்ளதை படித்தவுடன் நீங்கள் சிறிது மிரள்வது எனக்கு புரிகிறது. எம் தந்தை கருணையின் முழு வடிவம். அன்பின் தென்றல். முழுமையாக சரணடைந்து வணங்கியவர்க்கே அது புரியும்.

“தன் பொருநை சூடிய சிவமே !

பாதி மதி அணிந்த பரமே !

பஞ்சநாக லிங்க ரூபமே !

சித்த ராஜ பேரொளியே!

மகத்துவமான அகத்தியமே !

உன்பொற்பாதம் போற்றி போற்றி. “

--அடியவன் இவன் பிச்சைக்கார நாய்.

பொருள்:- தன் பொருநை என்ற தாமிரபரணி நதியை தன் தலையில் சூடிய ஈசன், இடகலையை குறைத்து யோகம்செய்து பரம்பொருளானவர், பஞ்ச இந்திரியங்களை அன்பால் அடக்கி தனக்கு குடையாக ஆக்கிய லிங்க ரூபம், சித்தர்களில் தலையாய சித்தர், அகத்திய மகாமுனி பொற்பாதம் சரணம் செய்வோம்.

ஓம் அகத்தீசாய நமஹ.

அகத்திய பக்தன்.